Մոտիվացնող կամ ինքնօգնող գրականության տարածումը, տարատեսակ հավաքներն ու սեմինարները վկայում են, որ մարդկանց համար առաջնային նշանակություն են ստանում կյանքի իմաստի ու նպատակի որոնումը, ինքնաճանաչողությունն ու աճը, մտավոր առողջությունն ու բարօրությունը:
Այն, ինչ կատարվում է աշխարհում, ստիպում է մարդկանց ներփակվել ու աշխատել անհատի զարգացման մակարդակում: Գրքերը՝ օգնական:
Փոխօգնություն առաջարկող գրքերից շատերը որդեգրում են տարբեր հին մշակույթների, հոգևոր ուղղությունների, բնիկների հավատալիքների գաղափարներ, ներկայացնում գաղտնուսական կամ խորհրդապաշտական ավանդույթներ: Նման գրքերից է Դոն Միգել Ռուիսի հեղինակած «Չորս համաձայնությունները», որը լույս է տեսել 1997 թ․ և մեծ ոգևորությամբ է ընդունվել՝ թարգմանվելով ու տարածվելով աշխարհում:
Ռուիսը մեծ համբավ է վայելում ու ունի բազում հետևորդներ: Նա մեքսիկացի հոգևոր ուսուցիչ է, հանդես է գալիս ելույթներով և հարցազրույցներով, համարում է իրեն տոլտեկ մշակույթի կրող և տոլտեկ իմաստությանը հասանելիություն ունեցող անձ:
Տոլտեկ քաղաքակրթությունը մեսոամերիկյան հին քաղաքակրթություն է, որը Կենտրոնական Մեքսիկայում ծաղկում է ապրել 10−12−րդ դարերում և նշանակալի ազդեցություն է թողել տարածաշրջանի մշակութային դիմագծի վրա:
.jpg)
Տոլտեկների մշակույթը երբեմն համարվում է գաղտնուսական (էզոթերիկ), քանի որ դրա վերաբերյալ պատմական, փաստական և հնագիտական վկայությունները խիստ սահմանափակ են, և տոլտեկների մասին տեղեկությունների մեծամասնությունը մեզ է հասել ավելի ուշ զարգացում ունեցած քաղաքակրթությունների, օրինակ՝ ացտեկների միջոցով, որոնք հավանաբար իրենց լեգենդներն ու առասպելներն են ունեցել տոլտեկների վերաբերյալ:
Բացի այդ՝ 20−21−րդ դարերի որոշ հոգևոր ուղղություններ որդեգրել են տոլտեկ եզրը և առնչում են այն իրենց հնագույն իմաստությանը, գաղտնուսական գիտելիքին և հոգևոր ուսմունքներին: Մի շարք ժամանակակից հեղինակներ և հոգևոր ուսուցիչներ, այդ թվում՝ Կառլոս Կաստանեդան, Դոն Միգել Ռուիսը, իրենց համարում են տոլտեկ ուսմունքի ժառանգորդներ:
Ռուիսի ծնողները եղել են տոլտեկների հնագույն ավանդույթները կիրառող հեքիմներ և հավանաբար ընտանիքի հիմնական զբաղմունքն ու տանը շրջանառվող պատմություններն են ոգեշնչել Ռուիսին: Այնուամենայնիվ, այն, ինչ նա անվանում է տոլտեկ իմաստություն, պետք է ընկալել որպես այդ հնագույն մշակույթի ժամանակակից մեկնաբանություններ, որոնք անձնական բնույթ ունեն:
«Չորս համաձայնությունները» գրքից կարող եք մեջբերումներ կարդալ այստեղ:
