Մենք այստեղ ենք՝ գրքերի աշխարհում: Դո՞ւք էլ:
Այստեղ կարող ենք միմյանց օգտակար լինել՝ սկսած տեղեկություններ փոխանցելուց մինչև վստահելի գործընկերության հաստատում, որի հիմքում գրականության, ընթերցանության հանդեպ սերն է, միմյանց հանդեպ հարգանքն ու հոգածությունը:
Կհիշե՞ք Բրեդբըրիի «Ֆարենհայթ 451»-ը, երբ ապագայի աշխարհն այլևս գրքերի կարիք չուներ, գրքերն ապրում էին մարդկանց մեջ: Մեր մեջ էլ կան ու ապրում են գրքեր. դրանք մանկությունից մեզ հետ են եղել, օգնել են ձևավորելու մեր ներաշխարհն ու անգամ արժեքային հորիզոնը: Մենք մարդիկ ենք, որոնց մեջ ապրում են գրքեր: Ահա թե ինչն է մեզ միավորում:
Մեր շուրջն, իհարկե, ամեն ինչ փոփոխվում է գիտաֆանտաստիկ արագությամբ: Հեղինակները՝ հայ, համաշխարհային, փորձում են որսալ իրենց ժամանակը: Իսկ մենք փորձում ենք զգալ գրականության վերստեղծած ժամանակը․ մենք՝ որպես հրատարակչություն, դուք՝ որպես ընթերցող կամ հասարակություն:
Ապրելու և առաջ ընթանալու համար պետք են գրքեր. ոչ միայն գրքերի աշխարհում, այլև բոլոր հնարավոր աշխարհներում հնարավորությունները ստեղծվում են գիտելիքի շնորհիվ: Եվ իրականանում են գիտելիքի շնորհիվ: «Զանգակ» հրատարակչությունն առհասարակ ստեղծվել է այս հավատամքով:
Ի վերջո, ինչպե՞ս է հնարավոր դառնում գրելը, հրատարակելը, ընթերցելը: Երեք նախապայման առանձնացնենք՝ գիտելիքը, սերը և հոգածությունը: Մեր պատկերացումներում zangak.am-ը գիտելիքի, սիրո և հոգածության յուրատեսակ շտեմարան է:
Այստեղ ենք կուտակելու մեր փորձը, ներկայացնելու հրատարակչության առկա տեսականին, ստեղծելու փոխադարձ կապի ու ծանոթության տարատեսակ հնարավորություններ, այստեղ ենք լինելու ամեն օր՝ սպասելով ձեր այցին, նամակին կամ արձագանքին:
Կհանդիպենք:
Չձանձրանա՛ք:
Ու չտխրե՛ք:
Մեզ վայել չէ, մենք գիրք–մարդիկ ենք:
Մեր մեջ ղողանջում են կյանքը,
ԳԻՏԵԼԻՔԸ, ՀՈԳԱԾՈՒԹՅՈՒՆԸ, ՍԵՐԸ:
Ձեր՝
zangak.am